Shoferi i autobusit ku u gjetën të fshehura 100 mijë euro të padeklaruara, u la në burg me vedim të gjykatës së Durrësit. Seanca për caktimin e masës së sigurisë u zhvillua nga gjyqtari Sokol Mara, i cili e vlerësoi të ligjshëm arrestimin e Elson Rrodhes. Ky i fundit do qëndrojë në qelinë e paraburgimit deri në përfundimin e plotë të hetimeve nga ana e prokurorisë, ku më pas do merret një tjetër vendim për fatin e tij. 37 vjecari u arrestua dy ditë më parë në pikën kufitare të portit detar Durrës, pasi autobusi i tij kaloi për kontroll në vijë të dytë, ku gjatë kontrolleve të ushtruara, policia gjeti 100 mijë euro të padeklaruara, të fshehura në tavanin e autobusit të linjës Bari-Durrës. Sasia e eurove ishte ndarë në 8 pako, kishin prerje të ndryshme dhe ishin të mbledhura me qese vakumi, ku mbi to ishin të shënuara me bojë të zezë shuma e parave. 37 vjecari u vendos në pranga dy ditë më parë në kudaër të operacionit të koduar Entry. Autobusi tip “Scania” i linjës Durrës-Bari-Durrës, që drejtohej nga Rrodhe kaloi në vijën e dytë, për kontroll më të detajuar, ku në të u gjetën gjithësej 99 700 euro, të cilat u sekuestruan në cilësinë e provës materiale. 37 vjecari akuzohet për kryerjen e veprës penale “Mosdeklarimi në kufi i të hollave dhe i sendeve me vlerë”.