Kim Jong Un ka lavdëruar ushtarët e Koresë së Veriut që vranë veten duke shpërthyer granatat e tyre ndërsa luftonin për Rusinë kundër Ukrainës, duke konfirmuar një politikë të dyshuar prej kohësh në fushën e betejës. Në një fjalim këtë javë, udhëheqësi i Koresë së Veriut tha se ata që "zgjodhën pa hezitim vetë-flijimin, për të mbrojtur nderin e madh" ishin "heronj". Koreja e Jugut vlerëson se të paktën 15,000 koreanoveriorë janë dërguar për të ndihmuar Rusinë të rimarrë pjesë të Kurskut dhe më shumë se 6,000 janë vrarë deri më tani. As Peniani dhe as Moska nuk i kanë konfirmuar shifrat. Agjencitë e inteligjencës dhe dezertorët kanë thënë se ushtarët ishin urdhëruar nga Peniani për të vrarë veten për të mos lejuar që të kapeshin rob nga Ukraina. "Vetëflijimi i tyre pa pritur kompensim dhe përkushtimi pa pritur shpërblim... Ky është përkufizimi i kulmit të besnikërisë së ushtrisë sonë", tha Kim Jong un në Penian, ndërsa zbuloi një memorial për trupat e rënë. Ministri rus i Mbrojtjes Andrey Belousov dhe kryetari i parlamentit të Rusisë, Vyacheslav Volodin, ishin mes të pranishmëve në ngjarje. Në Korenë e Veriut, ushtarëve u mësohet se kapja rob është një akt tradhtie. Më herët këtë vit, transmetuesi i Koresë së Jugut MBC transmetoi një program me dy të burgosur lufte të Koresë së Veriut në Ukrainë, njëri prej të cilëve tha para kameras se i vinte keq që nuk i mori jetën vetes. "Të gjithë të tjerët e hodhën veten në erë. Unë nuk munda", tha i burgosuri.