Rreth 13 gëzhoja të kalibrit 9 milimetra janë sekuestruar si provë materiale gjatë atentatit të ndodhur të dielën në Sarandë, ku mbeti I vrarë 44-vjeçari Artan Murtaj, i cili njihej si “Tani Ruzhdiut”. Policia ka marrë në pyetje 20 persona që ndodheshin në zonë në momentin e atentatit, ndërsa hetuesit po punojnë me kamerat e qytetit. Autoritetet kanë vijuar kontrollet në akset dalëse të Sarandës ku janë ngritur postblloqe kontrolli për identifikimin dhe kapjen e autorëve. Një nga pistat që po verifikohet është ajo e një atentati të kryer nga vrasës me pagesë, ndërsa nuk përjashtohet mundësia që vrasja të jetë pjesë e vazhdimit të konfliktit të nisur pas ngjarjes së korrikut të vitit të kaluar, ku u plagosën me armë zjarri Ernest Lama dhe Gëzim Hajdaraj. 44-vjeçari Artan Murtaj, sapo ishte ulur për kafe në një lokal pranë kryqëzimit të ish-agjencia, kur dy autorë të maskuar me një motor, që kishin ardhur nga rruga “Lefter Talo”, iu afruan dhe qëlluan të paktën dy herë. Kafja ndodhet në mes të qytetit të Sarandës, ndërsa 44 vjeçari sapo ka pikasur autorët tentoi të të largohej me vrap drejt rrugës “Vangjel Pandi”, por autorët e ndoqën dge e vranë në mes të rrugës.