25-vjeçarja Ana Dyrmishi, e cila pësoi djegie në rreth 85% të sipërfaqes së trupit pas zjarrit të rënë në hotelin “Brooklyn” në Vlorë, është nisur për trajtim të specializuar në Turqi. E reja, e cila ndodhej në hotel për pushime, qëndroi nën kujdesin intensiv të ekipeve mjekësore në QSUT pas ngjarjes së rëndë. Pas përfundimit të procedurave mjekësore dhe administrative, në koordinim me Ambasadën e Turqisë dhe autoritetet shëndetësore turke, 25-vjeçarja do të vijojë trajtimin në një spital të specializuar në Turqi. Shpenzimet e trajtimit do të mbulohen nga shteti shqiptar, përmes Ministrisë së Shëndetësisë dhe Mirëqenies Sociale. Ministria ka deklaruar se do të vijojë të garantojë kujdesin mjekësor dhe aksesin në trajtime të specializuara për pacientët që kanë nevojë për ndërhyrje dhe ekspertizë të avancuar jashtë vendit.