Shefi i Policisë në Teheran, Hossein Rahimi, ka thënë se vdekja e një gruaje gjatë kohës që ajo ishte në qeli, e ndaluar, ka qenë aksident “fatkeq”, që nuk dëshiron të përsëritet. Mahsa Amini, 22-vjeçare, ra në koma javën e kaluar, disa orë pasi ‘policia e moralit’ e ndaloi atë nën dyshimet se kishte shkelur rregullat për vendosjen e hixhabit. Dëshmitarët kanë akuzuar policinë se e kanë rrahur atë, por Rahimi ka mohuar akuzat. Vdekja e saj ka nxitur protesta në Teheran dhe në perëndim të vendit, ku dy persona është raportuar të jenë vrarë në përleshjet me policinë ditën e hënë. Në disa video të publikuara në rrjetet sociale janë parë disa njerëz duke qëlluar me gurë dhe më pas duke u larguar pas të shtënave me armë zjarri. Në disa pamje tjera janë shfaqur protestuesit në Teheran, dhe disa gra që kanë hequr shamitë e kokës duke thirrur: “vdekje diktatorit”, një shprehje kjo e përdorur për liderin suprem, Ayatollah Ali Khamenei. Amini, kurde etnike, nga qyteti perëndimor, Saqez në provincën e Kurdistanit, vdiq të premten në spital, pas tre ditëve në koma. Ministria e Brendshme, tha se Amini duket se kishte pasur “probleme shëndetësore në të kaluarën”. Megjithatë, babai i viktimës u tha mediave se vajza e tij ishte “e shëndetshme dhe pa probleme shëndetësore”.