Ministri i Jashtëm i Turqisë, Hakan Fidan, ka akuzuar Izraelin se po e dwrgon Lindjen e Mesme drejt një “katastrofe të plotë” me sulmet e fundit ndaj Iranit, të nisura më 13 qershor. Duke folur në samitin e Organizatës për Bashkëpunim Islamik (OBI) të mbajtur më 21 qershor në Stamboll, Fidan deklaroi se situata nuk përbën më një çështje vetëm palestineze, libaneze, siriane, jemene apo iraniane, por “është qartazi një problem izraelit”. Ai bëri thirrje për ndalimin e menjëhershëm të “agresionit të pakufizuar” kundër Iranit dhe paralajmëroi se përshkallëzimi i konfliktit mund të rrezikojë sigurinë rajonale dhe globale. Pas tij, presidenti turk Recep Tayyip Erdogan kritikoi fuqishëm mbështetjen që Perëndimi i jep Izraelit, duke e quajtur “të pakushtëzuar”, dhe theksoi se Turqia nuk do të lejojë ndryshimin e kufijve në Lindjen e Mesme “me gjak”. Ai kërkoi më shumë solidaritet mes vendeve islame për të ndalur, siç u shpreh, “banditizmin izraelit” në Palestinë, Siri, Liban dhe Iran. Organizata për Bashkëpunim Islamik, e themeluar në vitin 1969, ka për mision mbrojtjen e interesave të botës myslimane dhe promovimin e paqes ndërkombëtare.