Turqia, në prapaskena, po bisedon me Hamasin për lirimin e të huajve, izraelitëve dhe fëmijëve që mbahen peng nga militantët, tha ministri i jashtëm i vendit, Hakan Fidan. Kreu i diplomacisë turke vizitoi Bejrutin me ftesë të homologut të tij libanez Abdullah Rashid Bouhabib. Gjatë një konference për shtyp në Ministrinë e Punëve të Jashtme në Bejrut, Hakan Fidan tha se “shumë vende” i kanë kërkuar Turqisë që të sigurojë lirimin e shtetasve të tyre të mbajtur peng nga Hamasi. “Ndaj, kemi filluar të bisedojmë, veçanërisht me krahun politik të Hamasit”. Ministri Fidan tha se e ka diskutuar këtë çështje me liderin e Hamasit, Ismail Haniyeh, sipas një burimi të Ministrisë së Jashtme turke. “Ne po bëjmë gjithçka që mundemi për të parandaluar përshkallëzimin e konfliktit dhe destabilizimin e vendeve të rajonit, përfshirë Libanin, Egjiptin dhe Jordaninë”, tha ai. Ka ardhur koha që komuniteti ndërkombëtar të ndërmarrë hapa serioze drejt krijimit të një shteti palestinez brenda kufijve të vitit 1967, me Jerusalemin si kryeqytet, shtoi ministri i Jashtëm turk. Presidenca turke njoftoi javën e kaluar fillimin e negociatave me Hamasin për lirimin e pengjeve. Presidenti turk Recep Taip Erdogan ofroi ndërmjetësimin e tij dhe shtoi kontaktet me liderët arabë dhe perëndimorë. Ministri i jashtëm i turqisë ndërkohë po merr pjesë në takimin e organizatës së bashkëpunimit islamik, në xhedah të arabisë saudite. Turqia, ka luajtur rol në disa raste në situata pengjesh dhe robërish lufte, dhe ka patur sukses në këtë drejtim me Rusinë e Ukrainën.