Si Rusia ashtu edhe Ukraina kanë shtuar javët e fundit, sulmet kundër anijeve tregtare në Detin e Zi, duke rritur çmimet e drithërave në të gjithë botën. Zëdhënësja e Ministrisë së Jashtme ruse Maria Zakharova akuzoi U krainën për "akte të paturpshme terrorizmi" kundër transportit detar, ndërsa nuk përmendi sulmet e vetë Rusisë. "Ne i shohim këto sulme nga Ukraina si një politikë të qëllimshme që synon destabilizimin e transportit civil në rajonin e Detit të Zi për të përshkallëzuar më tej tensionet dhe për të zgjatur konfliktin, të gjitha me miratimin e hapur të fqinjëve rajonalë", tha Zakharova. "Në të njëjtën kohë, ne nuk shohim shenja përmirësimi të situatës dhe, rrjedhimisht, nuk shohim baza për masa gjysmake që thjesht i japin regjimit të Kievit një hapësirë të përkohshme frymëmarrjeje". Zakharova tha se po komentonte një deklaratë të Ministrit të Jashtëm të Turqisë, Hakan Fidan, sipas të cilit Ankaraja i kishte paraqitur propozime si Rusisë ashtu edhe Ukrainës për një moratorium mbi operacionet ushtarake në Detin e Zi. Ajo tha se Rusia nuk kishte marrë asnjë propozim zyrtar nga Turqia. Reuters raportoi të enjten se Ukraina i ka transmetuar një ofertë Rusisë, nëpërmjet një pale të tretë, që të dyja palët të ndalojnë sulmet ndaj objektivave civile në Detin e Zi.