Si pasojë e luftës në Iran, në mbarë botën mbizotëron pasiguri. Shumë shtete druhen nga një inflacion i zgjatur dhe mungesa e burimeve. Ndërkohë që vendet e Gjirit përpiqen të ruajnë imazhin e tyre si "streha të sigurta”, Turqia kalon në ofensivë: Me ulje të mëdha taksash dhe stimuj ekonomikë, Ankaraja synon të tërheqë veçanërisht investitorë dhe pasuri nga jashtë. Një paketë e re ligjore u shpall nga presidenti Recep Tayyip Erdoğan që në fund të prillit. Në fillim të majit ajo u paraqit në parlament dhe u miratua nga komisioni përkatës. Qëllimi është ta bëjë Turqinë më konkurruese ndërkombëtarisht dhe ta pozicionojë si një vend tërheqës për kapitalin e huaj dhe fuqinë punëtore të kualifikuar. Ligji u drejtohet personave dhe kompanive që gjatë tre viteve të fundit nuk kanë qenë të regjistruar si tatimpagues në Turqi, duke u premtuar atyre përfitime të konsiderueshme. Ata që regjistrojnë pasuritë e tyre jashtë vendit; valuta, ar apo letra me vlerë, në Turqi deri më 31 korrik 2027, do të përfitojnë një përjashtim 20-vjeçar nga tatimi mbi të ardhurat për fitimet e realizuara jashtë. Përveç kësaj, për këtë grup norma e tatimit për trashëgimi dhe dhurata ulet në vetëm një për qind. Aktualisht këto norma janë mes një dhe dhjetë për qind për trashëgimi dhe mes dhjetë dhe 30 për qind për dhuratat. Edhe pasuritë e brendshme që nuk janë deklaruar pranë autoriteteve tatimore deri më tani mund të deklarohen pa pasoja penale në kushte të caktuara, për shembull nëse investohen për një periudhë të caktuar në obligacione shtetërore vendase ose në instrumente të ngjashme. Po ashtu, synohet edhe gjallërimi i tregtisë së jashtme. Qeveria synon të ulë tatimin mbi fitimin për kompanitë vendase. Për eksportuesit, norma ulet nga 25 në 9 për qind ndërsa për eksportuesit e tjerë, në 14 për qind. Dhe qershia mbi tortë është përpjekja e qeverisë për ta zhvulluar qendrën financiare të Stambollit në një qendër ndërkombëtare si Singapori apo Hong Kongu.