Administrata e presidentit amerikan Joe Biden njoftoi kongresin për shitjen e planifikuar të softuerëve të avionëve, për flotën aktuale të avionëve luftarakë F-16 që Turqia disponon, një marrëveshje kjo me vlerë 259 milionë dollarë. Kjo, përbën një hap përpara në lidhje me shitjen e paketave të modernizimit të avionëve të turqisë, pasi liderët e komiteteve në Kongres, dhanë miratimin paraprak. Por, marrëveshja e plotë, me kërkesën e turqisë, anëtare të NATO-s, për blerjen e miliarda dollarëve F16-ta, mbetet e bllokuar për shkak të kundërshtive në kongres. Nëse ky i fundit do të japë miratimin zyrtar, paketa do të ishte shitja e parë e madhe ushtarake për Turqinë, që kongresi ka miratuar në vite. “Turqia është një aleate e hershme dhe me vlerë e NATO-s”, tha një zëdhënës i departamentit amerikan të shtetit.