Turqia është izoluar ndërkombëtarisht dhe duhet ta ulë tonin, nëse dëshiron të fitojë lëshime të rëndësishme nga Bashkimi Evropian, tha një zyrtar i lartë evropian të mërkurën. Nacho Sanchez Amor, raportuesi për Turqinë në Parlamentin Evropian, tha se gjuha e vrazhdë e Ankarasë për politikat e jashtme është një prej pengesave kryesore në përmirësimin e marrëdhënieve të saj me Brukselin. Turqia synon të thjeshtëzojë aksesin në vizat evropiane për qytetarët e vet dhe të përditësojë një marrëveshje doganore me BE-në, të vitit 1995, i cila do të mundë ta ndihmonte në rritjen e eksporteve. Shefi i diplomacisë së BE-së, Josep Borrell, rekomandoi javën e kaluar që Turqisë t’i plotësohen këto dy kërkesa në këmbim të disa lëshimeve. Ankarasë i kërkohet të bëjë më shumë për cështjen e ishullit të ndarë të Qipros dhe të heqë dorë nga shmangia e sanksioneve kundër Rusisë. “Të përmbahesh nga përdorimi i një toni agresiv, një toni kërcënues, është e lehtë dhe jo e kushtueshme”, tha Sanchez Amor në Stamboll. “Ju jeni plotësisht të izoluar. Azerbajxhani është miku juaj i vetëm i vërtetë”, theksoi ai. Turqia e fitoi statusin e vendit kandidat për t’iu bashkuar Bashkimit Evropian në vitin 1999. Por, procesi është ngrirë që prej vitit 2018, për shkak të shqetësimeve të bllokut për të drejtat e njeriut në Turqi dhe politikës së jashtme të Ankarasë.