Pas francës dhe spanjës, ku zjarret vazhdojnë të jenë aktive, flakët kanë përfshirë edhe turqinë dhe greqinë, ku tre zjarrfikës humbën jetën gjatë operacioneve të shuarjes së flakëve. Në provincën jugore turke të Antalias, zjarrfikësit po luftojnë me disa vatra zjarri në rajonin turistik. Sipas agjencisë shtetërore të lajmeve Anadolu, një pjesë e tyre është shuar tashmë. Megjithatë, për shkak se flakët ishin pranë zonave të banuara, disa banorë u evakuuan si masë parandaluese. Disa shtëpi u shkrumbuan nga zjarri. Disa qendra turistike u mbyllën për qarkullimin për shkak të rrezikut nga zjarret. Guvernatori i Antalias, Hulusi Şahin, deklaroi se shkak i zjarreve janë temperaturat ekstreme, erërat e forta dhe ajri i thatë. Ai tha se pret që këto kushte të motit të vazhdojnë edhe gjatë ditëve në vijim. Vatra zjarri janë raportuar edhe në provinca të tjera në perëndim të turqisë, në jug të stambollit si edhe në provincën Muğla në jugperëndim të vendit. Presidenti turk Recep Tayyip Erdoğan bëri të ditur se janë regjistruar 90 vatra të reja zjarri, por shumica e tyre tashmë janë vënë nën kontroll. Sipas tij, rreth 3.000 efektivë të emergjencave dhe zjarrfikësve janë angazhuar në luftën kundër flakëve. Edhe në zonat bregdetare të Greqisë dhe në disa ishuj kanë shpërthyer zjarre të mëdha. Si pasojë, mijëra turistë dhe banorë u detyruan të largoheshin gjatë ditës. Gjatë një operacioni për shuarjen e një zjarri në Kretë, dy zjarrfikës humbën jetën. Sipas shërbimit zjarrfikës, ata humbën orientimin për shkak të tymit të dendur dhe mbetën të rrethuar nga flakët. Një përfaqësues i pushtetit lokal tha për televizionin publik ERT se zjarri në ishullin turistik është "jashtë kontrollit”.