Turqia dhe Bjellorusia kanë dalë në mbështetje të Rusisë, pas tensioneve më të fundit që kanë përfshirë vendin, për shkak të sulmeve që ushtria mercenare Vagner nisi mëngjesin e kësaj të shtune. Presidenti turk Rexhep Tajip Erdogan shprehu mbështetjen e tij të plotë ndaj Rusisë, deklaroi Kremlini zyrtar. “Me iniciativën e palës turke Putin dhe Erdogan diskutuan rebelimin që po vazhdon në Rusi dhe Erdogan shprehu mbështetjen e plotë për hapat e ndërmarrë nga udhëheqja ruse“, thuhet në një deklaratë nga Kremlini zyrtar. Sipas deklatatës, Erdogan ka këshilluar Putinin të gjykojë me kujdes situatën. Presidenti turk i rizgjedhur së fundmi e ka konsideruar më parë veten një ndërmjetës në luftën e Rusisë kundër Ukrainës. Prej kohësh ai është shfaqur i afërt me homologun rus, ndërsa marrëdhënien mes dy vendeve e ka cilësuar të veçantë. Përvec Turqisë edhe Bjellorusia doli krah Vladimir Putinit. Në deklaratën zyrtare të saj thuhet se Bjellorusia mbetet një aleate e Rusisë dhe se mosmarrëveshjet e brendshme ishin një dhuratë për Perëndimin. Këshilli i Sigurisë tha se nuk mund të mbetej indiferent ndaj ngjarjeve që po ndodhin në jug të Rusisë dhe paralajmëroi se rebelimi mund të çojë në katastrofë. Pamjet: AFP