Turqia e ka bllokuar aksesin në platformën sociale, Instagram, njoftoi të premten Autoriteti për Teknologji dhe Komunikim i Turqisë. Autoriteti nuk ka shpjeguar arsyet e as sa do të zgjasë kjo ndalesë, e cila pamundëson aksesin edhe në aplikacionin e Instagramit në telefonat mobilë. Ky vendim vjen dy ditë pasi zyrtari turk për komunikim, Fahrettin Altun, e kritikoi Instagramin për, siç tha, ndalimin e postimeve ngushëlluese për vrasjen e Ismail Haniyeh, liderit politik të Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian. "Kjo është thjesht censurë", tha Altun, drejtor për komunikim në Presidencën e Turqisë, duke thënë se Instagrami nuk kishte përmendur ndonjë shkelje në rregullat e saj kur e kishte marrë atë vendim. Pronarja e Instagramit, Meta, nuk ka bërë komente as për ndalesën dhe as për komentet e Altun. Autoriteti për Teknologji dhe Komunikim i Turqisë e publikoi vendimin e tij më 2 gusht në faqen e tij të internetit.