Policia turke ka arrestuar 12 persona lidhur me shembjen e ndërtesave në provincat juglindore të Gaziantepit dhe Sanliurfës, raportuan mediat lokale, pas tërmeteve të fuqishme që goditën Turqinë dhe Sirinë. Sipas agjencisë së lajmeve, DHA, të arrestuarit janë ndërtues dhe kontraktorë në fushën e ndërtimit. Të paktën 6.000 ndërtesa janë shembur pas tërmetit 7.8 ballësh që goditi Turqinë dhe Sirinë më 6 shkurt. Nga ky tërmet kanë vdekur mbi 25.000 persona. Numrim i madh i ndërtesave të shembura ka nxitur kritika mbi cilësinë e ndërtimeve.