Policia e Shkodrës njoftoi finalizimin e fazës së nëntë të operacionit Neonët, në kuadër të të cilit janë arrestuar në total 14 persona, të dyshuar për kultivim hashashi në ambiente të mbyllura në këtë qark. Operacioni i fundit u ndërmor në lagjen 10 korriku, në një tunel ish ushtarak, por që ishte përshtator si ambient për të kultivuar hashashin. Policia thotë se ka arrestuar në flagrancë dy shtetas, 30 dhe 35 vjeç, banues në fshatin Degë të Tropojës. Ata u kapën në ambientet e tunelit teksa kujdeseshin për bimët. Ndërkohë, në pranga u vu edhe një 40 vjeçar, punonjës i OSHEE, ndërsa u proceduan në gjendje të lirë tre kolegë të tij për akuzën e shpërdorimit të detyrës, të kryer në bashkëpunim. Policia thotë se në këtë operacion ka sekuestruar 670 bimë kanabis dhe mbi 250 pajisje elektrike që shërbenin për kultivimin e tyre në ambientin e mbyllur.