Gjykata e Apelit në Tiranë ka liruar nga qelia 5 protestues, të arrestuar pas tubimit të opozitës më 17 prill. Ndaj tyre është caktuar masa e sigurimit ‘detyrim për tu paraqitur në policinë gjyqësore’, duke urdhëruar gjithashtu lirimin e menjëhershëm. Protestuesit kaluan mbi 20 ditë në qeli, pas ndalimit për ushtrim të veprimeve të dhunshme gjatë tubimit të 17 prillit, të thirrur nga Partia Demokratike. Ndaj tyre rëndon vepra penale “Kundërshtim i punonjësit të rendit publik”, “Prishja e rendit dhe qetësisë publike”, ‘’Mbajtje pa leje të armëve shpërthyese dhe municionit.” Për veprimet e dhunshme të 5 protestuesve janë dërguar në Prokurori prova filmike për hedhje të bombave molotov dhe lëndë piroteknike, sulm ndaj godinave të institucioneve por edhe efektivëve të Policisë së Shtetit. Ata do të paraqiten periodikisht në organet e policisë gjyqësore, në vijim të hetimeve për ngjarjen e protestës.