‘Po jetojmë një tsunami infektimesh nëpër botë, kjo për shkak të variantit Delta dhe Omicron. Maria van Kherkove, përgjegjëse teknike për covidin në OBSH, në një intervistë për El Pais, paralajmëron se për të qenë të sigurt në një darkë krishtlindjeje, vetëm vaksina nuk mjafton. “Mendoj se jemi përballë një tsunami infektimesh në botë. Ia përsëris qeverive: mos prisni por reagoni tani. Dhe nuk e kam fjalën këtu për izolimet. Para se të fillojmë të shohim një rritje të shtrimeve në spital, ju lutemi, mbani maska, lehtësoni punën nga shtëpia, kufizoni kontaktet me personat e tjerë, evitoni takimet me shumë njerëz dhe investoni në sisteme ajrimi. Rrisni mbikqyrjen e gjenomave të viruseve dhe përgatisni spitalet. Tani duhet vepruar”. Ajo nënvizon se pritet që Omicron të arrijë ti shpëtojë në një masë të caktuar reagimit imunitar por kjo nuk do të thotë që vaksinat janë të padobishme. Do të thotë vetëm se mund të mos mbrojnë aq shumë sa c’kanë bërë me variantin delta.