ADN ka konfirmuar se trupi i pajetë i gjetur pasditen e 18 qershorit në një humnerë në fshatin Cerrunjë, i përket Eglant Koçit. Materiali gjenetik i kufomës përputhej me ADN e nënës së 34-vjeçarit, megjithëse se grupi hetimor ishte i bindur që trupi i përkiste të riut të humbur që nga data 4 qershor. Kjo për shkak të shenjës së operacionit, numrit të këmbës 40 dhe rrobave të zeza që kishte kufoma, të njëjtat që Eglanti është kapur për herë të fundit nga kamerat e sigurisë. Tashmë pritet që familja të tërheqë trupin e pajetë në morgun e Tiranës, ndërsa i dyshuari kryesor, Armand Shakaj endet i lirë. Ai është shpallur në kërkim nga Policia e Tiranës për vrasjen dhe zhdukjen e kufomës, për të cilën u deshën dy javë kërkime në malet mes kryeqytetit dhe Elbasanit. Nga sistemi TIMS nuk rezulton që Shakaj të ketë dalë jashtë vendit dhe ka dyshime se fshihet në Tiranë.