Presidenti amerikan Joe Biden, do të takohet me udhëheqësit e Koresë së Jugut dhe Japonisë të premten, për të diskutuar një përgjigje "të bashkërenduar" ndaj vendosjes së mijëra trupave të Koresë së Veriut për të ndihmuar luftën e Moskës kundër Ukrainës dhe për kërcënimin bërthamor të Phenianit. Takimi pritet të mbahet gjatë punimeve të Forumit të Bashkëpunimit Ekonomik Azi-Paqësor në Lima të Perusë. Vendosja e trupave të Phenianit në Rusi është një "zhvillim i rëndësishëm", u tha gazetarëve këshilltari për Sigurinë Kombëtare i Shtëpisë së Bardhë, Jake Sullivan, rrugës për në Lima. “Ne do ta trajtojmë atë me seriozitetin me të cilin meriton të trajtohet”, tha ai. Sullivan tha se takimi trepalësh do t'u mundësojë udhëheqësve të përgatiten për çdo lëvizje të mundshme "provokuese" nga Pheniani, përfshirë provat bërthamore dhe lëshimin e raketave balistike, ndërsa Shtetet e Bashkuara përgatiten për një ndryshim të administratës kur Donald Trump të marrë detyrën në janar. "Periudhat kalimtare kanë qenë historikisht periudha kohore kur Koreja e Veriut ka ndërmarrë veprime provokuese", tha Sullivan. Shtetet e Bashkuara kanë një politikë "parandaluese të gjerë" që synon të parandalojë kundërshtarët që të sulmojnë aleatët, duke përfshirë Korenë e Jugut dhe Japoninë. Politika thotë se Uashingtoni do t'u vijë në ndihmë nëse ata sulmohen, duke përfshirë potencialisht edhe përdorimin e kapaciteteve bërthamore amerikane.