Hetuesit gjetën një prej kutive të zeza në vendin e rrëzimit të një avioni pasagjerësh me destinacion Londrën, që ra në një zonë banimi në Ahmedabad të Indisë, duke vrarë të paktën 265 persona në bord dhe në tokë. Avioni Boeing 787-8 Dreamliner i Air India lëshoi një alarm paralajmërues pak para se të rrëzohej rreth drekës, të enjten, pasi u ngrit vetëm 100 metra mbi tokë. Një burrë në bordin e avionit me 242 pasagjerë dhe pjesëtarë ekuipazhi, i mbijetoi mrekullisht aksidentit, i cili la pjesën e pasme të avionit të ngulur në katin e dytë të një konvikti për stafin mjekësor nga një spital aty pranë. "Fillimisht, edhe unë mendova se do të vdisja, por pastaj hapa sytë dhe kuptova se isha ende gjallë", tha i mbijetuari Vishëash Kumar Ramesh, një shtetas britanik. Hunda dhe rrotat e parme të avionit të Air Indias ranë në një ndërtesë mense ku studentët po drekonin, thanë dëshmitarët.