Trupat britanike mund të dislokohen në Ukrainë për të siguruar një zonë tampon prej 1300 km, si pjesë e planit të Donald Trump për t'i dhënë fund konfliktit. Detajet e planit të Presidentit të zgjedhur amerikan për t'i dhënë fund luftës u bënë të ditura pas një telefonate me presidentin ukrainas Volodimir Zelenski, pas fitores së tij. Trump është zotuar vazhdimisht se do t'i japë fund luftës në Ukrainë dhe më parë ka thënë se do të nisë bisedimet e paqes sapo të hyjë në Shtëpinë e bardhë, në janar. Plani i tij parashikon një zonë të çmilitarizuar në vijën e frontit, si edhe që Kievi të pranojë të mos bashkohet me NATO-n për 20 vjet. Në këmbim, SHBA-të do të vazhdojnë të armatosin Ukrainën deri në dhëmbë për të parandaluar një pushtim tjetër, të mundshëm, të Putinit. Por SHBA nuk do të dërgonte trupa për të monitoruar zonën e demilitarizuar dhe as për të financuar misionin atje. Një anëtar i ekipit të Trump tha për Ëall Street Journal: "Ne mund të bëjmë stërvitje dhe të ofrojmë lloje të tjera mbështetjeje, por armët në duar do ti mbajnë evropianët. Ne nuk dërgojmë burra dhe gra amerikane për të ruajtur paqen në Ukrainë. Dhe ne nuk paguajmë për këtë. Këtë mund ta bëjnë polakët, gjermanët, britanikët dhe francezët". Kievi po pret me ankth të shohë lëvizjen e radhës të Trump, ndërsa ukrainasit thonë se shpresojnë se presidenti i ri i zgjedhur do të jetë një "thirrje zgjimi për Evropën ".