Teksa zgjedhjet e 11 majit sa vijnë e afrohen, OSBE/ ODIHR njofton rritjen e numrit të vëzhguesve të saj në zgjedhje krahasuar me ato të 4 viteve më parë. Në një njoftim të shpërndarë nga ODIHR bëhet e ditur se numri i vëzhguesve të saj në këto zgjedhje do të jetë 326, krahasuar me 274 që ishin në zgjedhjet e kaluara parlamentare, duke rritur numrin e tyre me 52 vëzhgues. Sipas ODIHR, 300 vëzhgues do të vijnë ditën e zgjedhjeve dhe do të shpërndahen në të gjitha qarqet, teksa 26 vëzhgues afatgjatë do të vendosen në vendin tonë më herët, të cilët do të vëzhgojnë edhe fushatën elektorale dhe situatën para e paszgjedhore. Në mesin e vëzhguesve afatgjatë janë ekspertë të ODIHR, që do të merren edhe me hartimin e raportit për zgjedhjet e 11 majit, dhe para se ata të largohen publikojnë raportin paraprak me gjetjet e tyre. Teksa në zgjedhjet e fundit të mbajtura në Shqipëri, ato lokale të vitit 2023, shefe e misionit të vëzhguesve të ODIHR, ishte Audrey Glover, 82-vjeçarja britanike nuk dihet nëse do jetë apo jo në krye të këtij misioni edhe këtë vit, apo ODIHR do të caktojë dikë tjetër. Glover është një njohëse e mirë e situatës politike e zgjedhore në vendin tonë.