"Ka mjete ekonomike që mund të përdoren si leva, e ka po ashtu edhe mjete ushtarake", tha Vance për gazetën. Komentet e tij kanë një ton dukshëm të ndryshëm nga deklaratat e tjera të fundit nga Shtëpia e Bardhë, përfshirë ato të presidentiit Trump, i cili sugjeroi këtë javë se Ukraina “mund të jetë ruse një ditë”, pak para se të njoftonte se negociatat e paqes do të fillonin menjëherë pas një telefonate me Putinin. Deklarata e Vance bie gjithashtu në kontrast me Sekretarin e Mbrojtjes Pete Hegseth, i cili tha se SHBA nuk do t'i jepte më prioritet sigurisë evropiane dhe ukrainase. Këtë javë, ai u tha aleatëve të NATO-s se trupat evropiane dhe jo-evropiane, por jo amerikanët, do të duhej të kontrollonin çdo marrëveshje midis Ukrainës dhe Rusisë. Intervista e Ëall Street Journal u publikua përpara se Vance të takohej me presidentin ukrainas Volodymyr Zelensky në Konferencën e Sigurisë së nivelit të lartë në Mynih në Gjermani. Me të mbërritur në Mynih Vance tha se NATO mbetet një aleancë e rëndësishme për Shtetet e Bashkuara. "Evropa është sigurisht një aleat shumë i rëndësishëm për Shtetet e Bashkuara, NATO është një aleancë shumë e rëndësishme ushtarake, por ne duam të sigurohemi që NATO të ndërtohet për të ardhmen dhe pjesë e kësaj është sigurimi që NATO të mbajë pak më shumë barrën në Evropë, në mënyrë që Shtetet e Bashkuara të mund të fokusohen në disa nga sfidat tona në Azinë Lindore", tha Vance. Një ndjenjë pasigurie dhe ankthi që ka përfshirë Evropën javën e kaluar, pas njoftimit të Trump, që ngjalli frikën se mund të arrihet një "marrëveshje e pistë" me Putinin për t'i dhënë fund luftës me kushte të favorshme për Moskën pa përfshirjen e Kievit. Shumëkush në Evropë u trondit që Trump i ofroi lëshime Moskës para se të binte dakord për bisedimet e paqes. Komentet e tij dhe të Hegseth vunë gjithashtu në pikëpyetje të ardhmen e unitetit, burimeve dhe financimit të NATO-s, një gur themeli i sigurisë evropiane që nga Lufta e Dytë Botërore. Befasi ishte edhe fakti që Trump foli me Putinin para se të fliste me Zelenskin.