Sekretari amerikan i Mbrojtjes, Pete Hegseth, ka urdhëruar tërheqjen e afër 5 mijë trupave nga Gjermania brenda vitit të ardhshëm, ka bërë me dije Pentagoni. Vendimi ka ardhur pasi presidenti I SHBA, Donald Trump, njoftoi se tarifat për makinat dhe kamionët nga Bashkimi Evropian do të rriten në 25 për qind javën e ardhshme, duke hedhur akuza ndaj bllokut evropian se nuk po respekton marrëveshjen tregtare të nënshkruar verën e vitit 2025. Pentagoni ka deklaruar se tërheqja e trupave amerikane do të përfundojë gjatë gjashtë deri në dymbëdhjetë muajt e ardhshëm”. Gjatë dy mandateve presidenciale, Trump ka deklaruar se do të ulë numrin e trupave amerikane në Gjermani dhe në shtete të tjera evropiane, duke thënë se dëshiron që Evropa të marrë më shumë përgjegjësi për mbrojtjen e saj, në vend se të varet nga Uashingtoni. Trump tha se mund të tërheqë trupat amerikane nga Italia dhe Spanja për shkak të kundërshtimit të luftës në Iran. Trump akuzoi një ditë më parë prodhuesit gjermanë të makinave, se po i shfrytëzojnë amerikanët, duke thënë se Gjermania dhe “shtetet të tjera evropiane nuk i janë përmbajtur marrëveshjes sonë tregtare”. Gjermania pritet të goditet nga një tarifë e lartë për automjetet, pasi ajo përbën një pjesë të konsiderueshme të eksporteve të makinave të BE-së.