Duke shtrirë duart, në një pozë karakteristike të Donald Trump, Ryan Chen imiton zërin dhe gjestet e presidentit amerikan me aq saktësi sa që është bërë një fenomen i mediave sociale me videot e tij qesharake. 42-vjeçari nga Kina Jugperëndimore nuk merret me satirë politike, që është një fushë e minuar në vend që mund të cojë edhe në pezullimin e llogarisë së tij, por ka grumbulluar miliona ndjekës në Instagram, TikTok dhe platformat e tjera kineze. "Trump është një pus i pafund që nuk thahet kurrë, sepse ai tërheq më shumë trafik online se kushdo tjetër në planet", thotë Chen për AFP-në në qytetin e tij të lindjes, Chongqing, i cili po ashtu është bërë viral për shkak të peizazhit të tij dhe ushqimit pikant. Gjatë videove të tij, të cilat janë në anglisht me titra kineze, Chen paraqet kuzhinën kineze, zakonet, ndryshimet kulturore, bën shaka me të huajt dhe kërcen nën tingujt e këngës "YMCA (uaj em si ej)" të Village People, një nga këngët kryesore skenike të Trumpit.