Presidenti i zgjedhur amerikan, Donald Trump, tha se do të rikthejë zyrtarin me qëndrim të ashpër kundër imigrimit, Tom Homan, për të mbikëqyrur kufijtë shtetërorë në administratën e ardhshme të tij. Republikani 78-vjeçar është zotuar se që në ditën e parë të presidencës së tij, do të nisë operacionin më të madh në historinë amerikane, duke dëbuar imigrantët pa dokumente. “Jam i lumtur të njoftoj se ish-drejtori i Kontrollit Kufitar, Tom Homan, do t’i bashkohet administratës Trump, i angazhuar për kufijtë kombëtarë. Ai do të jetë Cari i kufijve”, ka shkruar Trump në platformën e tij sociale, Truth Social. “E njoh Tomin prej një kohe të gjatë dhe nuk ka asnjë njeri tjetër që mund të kontrollojë më mirë se ai kufijtë tanë”, shkruante ai. Homan do të jetë i angazhuar për “dëbimin e të huajve që në mënyrë të paligjshme hyjnë në vendin tonë”, shtoi trump. Ish-presidenti amerikan i fitoi bindshëm zgjedhjet e 5 nëntorit, ndërsa gjatë fushatës zgjedhore përsëriti disa herë se do të dëbojë imigrantët pa dokumente ndërkohë që ka përdorur retorika të dhunshme për ata që “helmojnë gjakun” e Shteteve të Bashkuara. Ndonëse Qeveritë amerikane kanë probleme prej vitesh në menaxhim të kufirit jugor me Meksikën, Trump ka rritur edhe më shumë shqetësimet, duke pretenduar se po ndodh një “pushtim” i SHBA-së nga migrantët, të cilët do të dhunojnë dhe vrasin amerikanët. Megjithatë, statistikat tregojnë se dhuna dhe krimi në këtë zonë kufitare, që ishin rritur gjatë administratës së parë të Trumpit, është zvogëluar vit pas viti në administratën aktuale të presidentit Joe Biden.