Presidenti i Shteteve të Bashkuara, Donald Trump, tha se presidenti i Ukrainës, Volodymyr Zelensky, “do të përfshihet” në negociatat për t’i dhënë fund pushtimit të vendit të tij nga Rusia, ndërsa shtoi se “shumë shpejt” mund të takohet edhe me liderin rus, Vladimir Putin. “Nuk ka kohë të caktuar, por mund të ndodhë shumë shpejt”, u tha Trump gazetarëve në bordin e avionit Air Force One. “Unë mendoj se ai dëshiron t’i japë fund luftës. Ata duan ta përfundojnë shpejt. Të dy. Edhe Zelensky”, tha Trump të dielën. Duke iu drejtuar gazetarëve në të njëjtën ditë, në një event sportiv në Florida, Trump tha se Zelensky “do të përfshihet” në bisedimet për paqe. Javën e kaluar kishte shqetësime se Uashingtoni do të mund të arrinte marrëveshje me Rusinë, duke anashkaluar Kievin dhe Evropën. Bloomberg, duke cituar zyrtarë të paidentifikuar, raportoi një ditë më parë se Trump dëshiron të sigurojë një armëpushim deri në Festën e Pashkëve, e cila bie më 20 prill të këtij viti. Komentet vijnë në kohën kur udhëheqësit amerikanë janë duke u përgatitur për bisedime me Rusinë në Arabinë Saudite, nën udhëheqjen e sekretarit amerikan të Shtetit, Marco Rubio. Negociatori i Lindjes së Mesme, Steve Ëitkoff, dhe këshilltari për siguri kombëtare, Mike Ëaltz, do të marrin pjesë gjithashtu, njoftoi Shtëpia e Bardhë. Trump u tha gazetarëve se ekipi i tij ka pasur bisedime “të gjata dhe të vështira” me zyrtarët rusë dhe se Ëitkoff, së fundmi, ka biseduar për rreth tri orë me Putinin. Zelensky mbërriti në Lindjen e Mesme të dielën, por Kievi tha se vizita e tij në Emiratet e Bashkuara Arabe, Arabinë Saudite dhe Turqi ka për qëllim shtimin e lidhjeve ekonomike dhe se nuk ka plane për t’u takuar me zyrtarë amerikanë apo rusë. Këshilltari i lartë i Zelenskyt, Mykhaylo Podolyak, tha se “nuk ka negociator që do ta përfaqësojë Ukrainën në Arabinë Saudite” në bisedimet e paqes. “Sot, nuk ka asgjë në tryezën e bisedimeve që mund të diskutohet. Rusia nuk është gati për negociata”, i tha ai Televizionit të Ukrainës.