Presidenti amerikan Donald Trump tha se administrata e tij po flet me Kinën për të arritur një marrëveshje tarifore dhe se Presidenti Kinez Xi Jinping e ka telefonuar atë, sipas një interviste për revistën Time të botuar të premten, pasi Pekini deri më tani ka kundërshtuar karakterizimin e bisedimeve nga SHBA-ja. Presidenti republikan nuk tha se kur Xi Jinping i ka telefonuar apo se çfarë diskutuan të dy udhëheqësit, duke i thënë TIME: "Ai telefonoi. Dhe nuk mendoj se kjo është një shenjë dobësie nga ana e tij". Ministria e Jashtme e Kinës nuk iu përgjigj menjëherë një kërkese për koment mbi deklaratën e Trump. Përpara se të publikoheshin komentet e fundit të Trumpit, ajo i kishte kërkuar Uashingtonit të ndalonte "mashtrimin e publikut" mbi negociatat dypalëshe tarifore. Trump shtoi se do të finalizojë marrëveshjet për tarifat brenda rreth tre ose katër javësh. I pyetur nëse do ta konsideronte një fitore nëse SHBA-të ende do të kishin tarifa deri në 50% në një vit, ai tha: "Fitore totale". Ministria e jashtme e Kinës i kërkoi në fakt Uashingtonit të premten të ndalojë "mashtrimin e publikut" në lidhje me negociatat dypalëshe të tarifave dhe tha se nuk ishte në dijeni të raporteve nëse Pekini po planifikonte të hiqte tarifat për disa importe amerikane. "Shtetet e Bashkuara dhe Kina nuk janë të angazhuara në konsultime ose bisedime mbi çështjen e tarifave", tha zëdhënësi i ministrisë së jashtme. Presidenti i SHBA-së Donald Trump tha të enjten se bisedime tregtare mes dy vendeve ishin duke u zhvilluar, por si ministria e jashtme e Kinës ashtu edhe ministria e tregtisë mohuan negociata të tilla. Raunde të shumta rritjesh të tarifave dhe masash hakmarrëse kanë rritur tarifat e SHBA-së mbi mallrat kineze në 145% dhe ato të Kinës mbi importet e SHBA-së në 125%, duke përmbysur operacionet e shumë bizneseve në të dyja ekonomitë.