Pasuria e Donald Trump u rrit me 3.6 miliardë dollarë, me presidentin e zgjedhur amerikan që arriti një pasuri prej 6.1 miliardë dollarësh falë aksioneve të tij në Trump Media & Technology Group, kompania që zotëron Truth Social. Llogaritjet janë bërë nga Forbes, sipas të cilit Trump në fillim të vitit kishte një pasuri prej 2.5 miliardë dollarësh. Në mars, presidenti i zgjedhur u pasurua më shumë pasi Truth Social e ndihmoi atë të arrinte në shtatë miliardë dollarë. Megjithatë, në prill, aksionet e Truth Social pësuan rënie, duke e "varfëruar" manjatin të paktën përkohësisht. Në maj, pasuria e tij shkoi në tetë miliardë dollarë me kuotimin e rrjetit të tij social në bursë, përpara se të binte përsëri kur u shpall fajtor nga një juri e Nju Jorkut për 34 akuza, për pagesën e yllit porno Stormy Daniels në këmbim të heshtjes së saj. Në muajt në vijim, pasuan ulje-ngritje, derisa pasuria e tij u vendos në 6.1 miliardë dollarë. Ndërkohë, sipas përllogaritjeve të Forbes, Trump shpenzon mesatarisht, bazuar në të dhënat që variojnë nga viti 2010 deri në vitin 2019, 130 milionë dollarë në vit. Katër vitet e tij të para në Shtëpinë e Bardhë e bënë atë të pasur, me bizneset e tij që realizuan 2.4 miliardë dollarë të ardhura dhe 550 milionë dollarë fitim midis 2017 dhe 2020.