Dhoma e Përfaqësuesve e SHBA-së miratoi projektligjin për taksat dhe shpenzimet, të kërkuar nga Presidenti Donald Trump. Deputetët votuan me 218 vota pro dhe 214 kundër për paketën legjislative, e cila u bë e njohur si "One Big Beautiful Bill" dhe për të cilën ka mjaft diskutime dhe kritika. Edhe senati e ka dhënë tashmë dritën e gjelbër. Tani presidenti Trump mund ta nënshkruajë projektligjin në mënyrë që ai të hyjë në fuqi më 4 korrik, në ditën e festës kombëtare, sikurse edhe synonte. Paketa përfshin një përzierje uljesh të taksave individuale dhe atyre të bizneseve, shpenzime masive për kontrollet e imigracionit, rritje të shpenzimeve ushtarake dhe një rritje të stimujve për karburantet fosile. Gjithashtu ka ndryshime në të drejtën për t'u përfshirë në programet shëndetësore dhe sociale, si dhe mbyllje të disa prej nismave të tranzicionit klimatik të iniciuara nga ish-Presidenti Joe Biden. Ndërkohë, një shumë prej 178 miliardë dollarësh do të shkojë për programe që synojnë të kufizojnë imigracionin, ndër të cilat bëjnë pjesë rifillimi i ndërtimit të murit kufitar me Meksikën, shtimi i personelit dhe i burimeve të policisë kufitare, hetimi dhe përndjekja penale e emigrantëve. Rreth 153 miliardë dollarë do të shpenzohen për mbrojtjen: ndërtim anijesh, sisteme për mbrojtjen nga raketat, armë bërthamore dhe mbështetje për ndihmën ushtarake në kufi. Gjithashtu do të ketë ulje taksash prej rreth 4.5 trilionë dollarësh për individët dhe bizneset. Por paketa legjislative "One Big Beautiful Bill", është kritikuar për shkak të barrës që pritet të ngarkojë ajo mbi buxhetin e SHBA-së. Ekspertët e pavarur vlerësojnë se brenda dhjetë viteve planet e Trumpit mund ta rrisin borxhin amerikan edhe me 3.4 trilionë dollarë. Prandaj këtë ligj e kritikuan edhe republikanët që janë konservatorë për sa i përket politikës fiskale.