Presidenti amerikan Donald Trump, të enjten themeloi Bordin e tij të Paqes, i cili fillimisht kishte për qëllim të ndihmonte në përfundimin e luftës në Gaza, por që tani ka një rol më të gjerë, që Evropa dhe vende të tjera kanë frikë se do të rivalizojë ose minojë Kombet e Bashkuara. Trump duket se i preku këto shqetësime në fjalën e tij hapëse në një ceremoni nënshkrimi për bordin, duke thënë se bordi i ri do të bashkëpunonte me OKB-në, ndërsa renditi çështje të tjera të mëdha diplomatike në rajon dhe në mbarë botën. "Kjo është një ditë shumë emocionuese, e përgatitur prej kohësh, dhe shumë vende sapo kanë marrë njoftimin e tyre, dhe të gjithë duan të jenë pjesë e saj, dhe ne do të punojmë me shumë të tjerë, përfshirë edhe Kombet e Bashkuara" Trump, i cili do të kryesojë bordin, ka ftuar dhjetëra udhëheqës botërorë t'i bashkohen Bordit dhe e sheh atë të adresojë sfida të tjera globale përtej armëpushimit të dobët në Gaza, megjithëse sic u shpreh vetë ai, nuk ka ndërmend që Bordi të zëvendësojë Kombet e Bashkuara. Disa aleatë tradicionalë të SHBA-së kanë hezituar të bashkohen me bordin, ku Trump thotë se anëtarët e përhershëm duhet të kontribuojnë me një pagesë prej 1 miliard dollarësh, duke u përgjigjur me kujdes ose duke refuzuar ftesën. Përfaqësues nga vendet e prezantuara si anëtarë themelues ishin të pranishëm në sallë ndërsa Trump fliste, por nuk u panë përfaqësues nga qeveritë e fuqive të tjera kryesore globale apo nga Izraeli dhe Autoriteti Palestinez.