Në mesin e kërcënimeve për vendosje tarifash, presidenti I zgjedhur Donald Trump ka mbajtur një qëndrim jo zyrtar dhe në dukje pak “tallës” për kryeministrin kanadez Justin Trudeau, të cilit në një postim në TruthSocial iu referua me titullin Guvernator. “Ishte një kënaqësi të darkoja me Guvernatorin Justin Trudeau të Shtetit të Madh të Kanadasë. Mezi pres të takoj sërish Guvernatorin së shpejti që të vazhdojmë bisedimet tona të thelluara mbi Tarifat dhe Tregtinë, rezultatet e të cilave do të jenë me të vërtetë spektakolare për të gjithë!” shkroi Trump. Qëndrimi i presidentit të ri republikan erdhi disa orë pasi kryeministri kanadez tha se vendi I tij do të përgjigjet nëse SHBA tarifon me 25% importet kanadeze. “Ne, sigurisht, siç bëmë tetë vjet më parë, do të përgjigjemi ndaj tarifave të padrejta në disa mënyra, dhe ende po shqyrtojmë mënyrat më të përshtatshme për të reaguar,” tha Trudeau gjatë një bisede me Dhomën e Tregtisë të Halifax-it të hënën.