Presidenti amerikan Donald Trump duket se është gati të urdhërojë sulme ndaj Venezuelës "në ditët në vijim", pasi ushtria amerikane nisi Operacionin Shtiza Jugore për të zhdukur kartelet e drogës. Uashingtoni po jep shenja të qarta se dritarja për presidentin Nicolás Maduro po mbyllet me shpejtësi dhe SHBA-të tani po përgatiten hapur për një përballje ushtarake. Administrata e Trump ka nisur një fushatë ushtarake në Karaibe dhe Paqësorin lindor, duke vendosur forca detare dhe ajrore për atë që e quan një ofensivë kundër drogës. Mbrëmjen e të enjtes, Sekretari i Mbrojtjes i SHBA-së Pete Hegseth njoftoi se operacioni ushtarak do të synonte "narko-terroristët" në Hemisferën Perëndimore. “Sot, po shpall Operacionin SHTIZA JUGORE. Ky mision mbron atdheun tonë, largon narko-terroristët nga Hemisfera jonë dhe pastron atdheun tonë nga drogat që po vrasin popullin tonë”, shkroi ai në platformën X. Postimi nuk dha detaje se çfarë përfshinte operacioni ose si mund të ndryshonte ai nga veprimet ushtarake që po ndërmerren tashmë. Por zyrtarët amerikanë thonë se Southern Spear do të synojë të shpërbëjë rrjetet e karteleve që Uashingtoni argumenton se mbështesin kontrollin e pushtetit të diktatorit venezuelian Nicolás Maduro. CBS Neës citoi më herët burime të shumta të thoshin se zyrtarë të lartë ushtarakë i kanë paraqitur tashmë Trumpit planet për operacione të mundshme në Venezuelë, duke përfshirë sulme tokësore. Burimet i thanë rrjetit se nuk është marrë asnjë vendim përfundimtar, por planifikimi është real, aktiv dhe po përshpejtohet. Jashtë dhomës së informimit, duket se gjithcka është gati tashmë. USS Gerald Ford, transportuesi më i madh i SHBA, është zhvendosur në zonën e përgjegjësisë së Komandës Jugore amerikane.