Presidenti amerikan, Donald Trump deklaron se një marrëveshje armëpushimi në Rripin e Gazës mund të arrihet “brenda javës së ardhshme”. Presidenti amerikan u tha gazetarëve në Zyrën Ovale se Shtëpia e Bardhë është në kontakte me palët e përfshira në konflikt, pa dhënë më shumë detaje se kush janë këto palë. Njoftimi i tij vjen në kohën kur një raport tronditës pretendon se gati 100,000 palestinezë janë vrarë në Gaza, çka përfaqëson rreth 5 për qind të popullsisë së territorit. Duke cituar një artikull të të përditshmes izraelite Haaretz, TrtGlobal, thotë se numri i të vdekurve është më i lartë se numri i viktimave të dhëna nga Ministria e Shëndetësisë e udhëhequr nga Hamasi, që thotë se nga tetori 2023, 56 mijë palestinezë kanë humbur jetën. Megjithatë, grupet humanitare përllogarisin se shifra është dy herë më e lartë, pasi pothuajse po kaq kanë gjetur vdekjen si pasojë e urisë, sëmundjeve dhe të ftohtit. Sipas të dhënave , 56% e të vrarëve kanë qenë ose fëmijë deri në moshën 18 vjeç, ose gra.