Ish-presidenti amerikan, Donald Trump e ka abuzuar seksualisht shkrimtaren, E.Jean Carroll, në vitet 1990, dhe më pas ka shpifur duke e quajtur atë gënjeshtare, tha juria e madhe në Shtetet e Bashkuara. E ashtuquajtura juri e madhe përbëhet prej një grupi qytetarësh, të cilëve ligji u jep autoritet për të hetuar shkeljet e mundshme penale të një pandehuri, dhe të vlerësojnë nëse duhet ndëshkuar ai. Juria kishte si detyrë të vendoste nëse Trump e ka dhunuar, abuzuar seksualisht, apo e ka prekur Caroll-in, pa dëshirën e saj. Juria me tetë anëtarë në gjykatën federale në Manhatan, thotë tani se Trump duhet t'i paguajë shkrimtares një dëmshpërblim prej 5 milionë dollarësh. Ndonëse të dhënat për abuzim seksual kanë qenë të mjaftueshme, juria nuk ka dalë në përfundimin se Trump e ka dhunuar atë. Vetë ky i fundit nuk ka qenë i pranishëm në gjyqin që nisi që më 25 prill. Carroll, 79-vjeçare, ka dëshmuar gjatë gjyqit civil se Trump, 76-vjeçar, e kishte dhunuar në një dyqan në Manhatan më 1995 ose 1996, më pas i kishte dëmtuar reputacionin duke shkruar në rrjetin e tij social, Truth Social, në tetor të vitit 2022, se pretendimet e shkrimtares janë gënjeshtra. President në periudhën 2017-2021, Trump është në krye të sondazheve për të fituar nominimin e republikanëve në garën për president. Në klimën aktuale politike në Shtetet e Bashkuara, tejet të polarizuar, ka pak mundësi që një vendim i tillë civil të ketë ndikim në bazën e mbështetësve të Trumpit. Ata i shohin vendime të tilla si përpjekje të kundërshtarëve të Trumpit për ta dëmtuar atë. Duke qenë se cështja ka qenë civile, Trump nuk përballet me pasoja penale. Kjo për shkak se Carroll ka kërkuar vetëm dëmshpërblimit monetar.