Po përdor ushtrinë kundër protestuesve në Los Angeles dhe po injoron urdhrat e qarta nga gjykatat; Presidenti amerikan Donald Trump, qartazi po trondit themelet demokratike të SHBA. Tensionet mbeten të larta në Los Angeles. Mijëra njerëz kanë demonstruar për ditë të tëra kundër veprimeve të autoriteteve të imigracionit në SHBA. Ndalim qarkullimi gjatë natës i vendosur nga kryetarja e bashkisë ka sjellë pak paqe dhe qetësi, por nuk ka shenja të zbutjes së tensionit. Garda Kombëtare, të cilën Presidenti i SHBA-së Donald Trump e vendosi në Los Angeles të shtunën, tani mbështetet nga 700 marinsa, një pjesë e forcave të armatosura amerikane të njohura si forca e reagimit të shpejtë dhe një njësi elitare e ushtrisë. Sipas një zëdhënëseje të ushtrisë amerikane, marinsat po ndihmojnë në mbrojtjen e ndërtesave dhe punonjësve të qeverisë federale, përfshirë ata të Imigracionit dhe Doganave. Por presidenti i SHBA-së nuk mundet thjesht të dërgojë Gardën Kombëtare ose Marinën në një shtet federal. Urdhri për vendosjen e tyre zakonisht lëshohet nga vetë drejtuesit e atij shteti. Në Kaliforni, guvernatori demokrat Gavin Neësom e hodhi poshtë shprehimisht vendosjen e trupave federale dhe ngriti një padi. Megjithatë, në raste të veçanta, presidenti amerikan mund të dërgojë njësi ushtarake edhe pa njoftuar guvernatorin përkatës, nëse në një shtet ka një rebelim të vazhdueshëm kundër autoritetit të qeverisë kombëtare. Sidoqoftë, operacioni ushtarak në Kaliforni i urdhëruar nga Trump është i pazakontë, sepse autonomia e 50 shteteve konsiderohet vlera më e lartë, e cila mund të shihet në emrin e vendit: "Shtetet e Bashkuara të Amerikës".