Presidenti amerikan Donald Trump ka kritikuar ish-aleatin e ngushtë Elon Musk për planin e multimiliarderit për të krijuar një parti të re politike. "Mendoj se është qesharake të krijosh një parti të tretë", tha Trump, duke folur me gazetarët të dielën para se të ngjitej në Air Force One. "Gjithmonë ka qenë një sistem dypartiak dhe mendoj se krijimi i një partie të tretë vetëm sa shton konfuzionin". Pasi e promovoi idenë për javë të tëra, Musk shkroi në platformën X gjatë fundjavës se kishte krijuar Partinë Amerikane për të sfiduar partinë Republikane dhe atë Demokratike. Trump dhe Musk më parë ishin aleatë të ngushtë, me shefin e Teslës që drejtonte Departamentin e Efikasitetit të Qeverisë (Doge), i cili ka si qëllim uljen e shpenzimeve federale. Musk ka kritikuar vazhdimisht politikat qeveritare që rrisin borxhin kombëtar të SHBA-së. Të dielën, ai tha se ndërsa partia e re mund të mbështesë një kandidat presidencial në një moment, "fokusi për 12 muajt e ardhshëm është në Dhomën e Përfaqësuesve dhe Senat". Trump ndërkohë shkroi në platformën e tij Truth Social të dielën: "Jam i trishtuar që e shoh Elon Musk të dalë plotësisht 'nga shinat' gjatë pesë javëve të fundit". Postimi synonte shtytjen e Musk për një "Mandat për Automjete Elektrike" që sipas tij do ti detyronte të gjithë të blinin një makinë elektrike. Plani i taksave dhe shpenzimeve i presidentit, të cilin ai e ktheu në ligj më 4 korrik, i dha fund lehtësirave tatimore për automjetet elektrike. Trump shtoi se e kishte kundërshtuar propozimin e Musk për një mandat për automjete elektrike që nga fillimi, duke shpjeguar arsyet e mospërfshirjes së automjeteve të tilla në legjislacion. "Njerëzit tani lejohen të blejnë çfarë të duan - me benzinë, hibrid ose teknologji të reja sipas nevojës - Asnjë mandat për automjete elektrike".