Jared Kushner vlerësoi potencialin 'shumë të madh' të bregdetit të Gazës një vit përpara se Presidenti Donald Trump të deklaronte se SHBA do të merrte nën kontroll zonën e shkatërruar nga lufta dhe të premtonte të ndërtonte atje 'rivierën e Lindjes së Mesme'. Kushner, ish-këshilltari i Trumpit në Shtëpinë e Bardhë dhe dhëndri i tij, sugjeroi në shkurt të vitit të kaluar që Izraeli të largonte civilët nga Rripi i Gazës dhe të pastrojë zonën. "Bregdeti i Gazës, mund të jetë shumë i vyer, nëse njerëzit do të fokusoheshin në ndërtimin e mjeteve të jetesës," tha Kushner në një intervistë për Middle East Initiative, një program i unversitar i Universitetit të Harvardit. "Nëse mendoni për të gjitha paratë që janë shpenzuar në këtë rrjet tunelesh dhe për të gjitha municionet, nëse ato do të kishin shkuar në arsim apo inovacion, çfarë mund të ishte bërë? Është një situatë fatkeqe atje, por unë mendoj se nga këndvështrimi i Izraelit, unë do të bëja më të mirën për t'i larguar njerëzit dhe pastaj për ta pastruar atë...", tha ai. Intervista e Kushner është rikthyer në vëmendje pasi Presidenti Trump të martën paraqiti një plan të ri për Lindjen e Mesme, në të cilin SHBA merr pronësinë e Rripit të Gazës ndërsa popullsia e saj palestineze zhvendoset në vendet fqinje. Trump, një sipërmarrës pronash të paluajtshme, që e sheh botën në terma kontratash, ka folur prej kohësh për vendndodhjen bregdetare të Gazës dhe klimën e këndshme si një destinacion të përsosur pushimesh. Deklarata befasuese e Presidentit gjatë konferencës së përbashkët për shtyp me kryeministrin izraelit Benjamin Netanyahu në Shtëpinë e Bardhë të martën shkaktoi ndërkohë një valë shoku jo vetëm në SHBA por edhe në botë. Në vizionin e Trump, rindërtimi i Gazës nga ana e SHBA-së do të krijonte mijëra vende pune dhe do t'i kursente palestinezëve dhimbjen dhe shpenzimet e rindërtimit. Kur një gazetar pyeti nëse kjo mund të përfshijë forcën ushtarake, Presidenti u përgjigj: "Nëse është e nevojshme, po". Dhe kur u pyet se kush do të jetonte atje, ai u përgjigj: “Unë parashikoj që njerëz nga e gjithë bota të jetojnë atje. Unë mendoj se ai vend mund të shndërrohet në një vend ndërkombëtar dhe të pabesueshëm”.