Kremlini të mërkurën e shpërfilli një koment të Presidentit amerikan Donald Trump, i cili e përshkroi Rusinë si një "tigër letre", dhe tha se Presidenti Vladimir Putin i vlerësonte përpjekjet e tij për të zgjidhur konfliktin në Ukrainë. Zëdhënësi i Kremlinit, Dmitry Peskov, tha se Rusia ishte një ari, jo një tigër, dhe se "nuk ekziston diçka e tillë si një ari prej letre". “Rusia ka luftuar pa qëllim për tre vjet e gjysmë, një luftë që një fuqie të vërtetë ushtarake duhet t’i kishte marrë më pak se një javë për ta fituar. Kjo nuk e nderon Rusinë. Në fakt, po e bën më shumë të duket si një ‘tigër letre’”, tha Trump. Ai shtoi po ashtu se besonte që Ukraina mund të rimerrte të gjithë territorin e pushtuar nga Rusia dhe se Kievi duhet të veprojë tani, me Moskën që përballet me probleme "të mëdha" ekonomike. Komentet e tij shënuan një ndryshim të papritur dhe të habitshëm retorik në favor të Ukrainës. Peskov, duke iu përgjigjur komenteve të Trump, tha se ushtria ruse po përparonte në Ukrainë dhe dinamikat në vijën e frontit ishin të dukshme. Ai tha se stabiliteti i ekonomisë ruse ishte i siguruar. Trump është bërë gjithnjë e më i frustruar me Putinin, ndërsa ai kërkon të ndërmjetësojë një fund të pushtimit të Ukrainës nga Rusia. Moska e ka intensifikuar luftën ndërsa Trump përpiqet ta përfundojë atë. Ai po i shtyn aleatët evropianë të ndërpresin importet e tyre të naftës dhe gazit rus dhe ka thënë se SHBA-të do të ndjekin shembullin e tyre për sanksione më të ashpra kundër Kinës, partnerit kryesor strategjik të Moskës. Peskov tha se Trump është një biznesmen dhe po përpiqet ta bëjë detyrojë botën të blejë naftë dhe gaz amerikan më të shtrenjtë.