Një burrë i arrestuar në një pikë kontrolli sigurie pranë vendit ku do të mbahej një tubim i kandidatit republikan për president Donald Trump në Kaliforni të shtunën përballet me akuza për armëmbajtje pasi atij iu gjetën armë zjarri të mbushura, pasaporta të shumta dhe një targë false, thanë zyrtarët lokalë të policisë. Ata thanë se besonin se ishte evituar një atentat, megjithëse kjo deri diku mund të dukej si një spekulim. I dyshuari u lirua me kusht, treguan të dhënat e burgut. Një zyrtar federal tha se një hetim ishte duke u zhvilluar. "Ajo që ne dimë është se ai u shfaq me pasaporta të shumta me emra të ndryshëm, me një automjet të paregjistruar me targa false dhe me armë zjarri të mbushura," tha policia. "Ne me të vërtetë besojmë se parandaluam një tjetër atentat". 49-vjeçari, i identifikuar si banor i Las Vegas, Vem Miller, u ndalua në një fuoristradë të zezë nga zyrtarët lokalë të policisë dhe u arrestua pa incidente. Trump nuk kishte dalë ende në skenë. Të dhënat e burgut tregojnë se Miller u lirua me kusht pasi pagoi një shumë prej 5,000 dollarësh, ndërkohë që u akuzua për posedim të një arme zjarri dhe municioneve në mënyrë të paligjshme. “Incidenti nuk ndikoi në sigurinë e ish-presidentit Trump ose të pjesëmarrësve në tubim”, tha zyra e sherifit në një deklaratë për shtyp. Zyra e Prokurorit të Los Anxhelosit, në një deklaratë në faqen e saj të internetit tha gjithashtu se Trump nuk ishte në rrezik, duke cituar Shërbimin Sekret të SHBA-së. Deklarata shtoi se ndërsa nuk ishte bërë asnjë arrestim federal, një hetim ishte në vazhdim.