Presidenti amerikan Donald Trump tha të mërkurën se ende po shqyrton mundësinë nëse do të marrë pjesë në bisedimet mbi luftën në Ukrainë, që janë planifikuar të mbahen të enjten në Turqi, por nuk e di nëse Presidenti rus Vladimir Putin do të jetë atje. "Ai do të donte që unë të isha atje, dhe kjo është një mundësi... Nuk e di nëse ai do të ishte atje nëse unë nuk jam. Do ta zbulojmë," u tha Trump gazetarëve në bordin e Air Force One gjatë rrugës për në Katar. Ai tha se mund të vizitojë Turqinë për bisedimet si pjesë e udhëtimit të tij në Lindjen e Mesme këtë javë. "Kemi një situatë të vështirë. Kjo nuk do të thotë që nuk do ta bëja për të shpëtuar shumë jetë njerëzish dhe të kthehesha më pas në turin e planifikuar", tha Trump. Ai vuri në dukje se Sekretari amerikan i Shtetit, Marco Rubio, do të ishte i pranishëm në bisedimet e së enjtes në Stamboll. Presidenti ukrainas Volodymyr Zelenskiy tha ndërkohë të martën se do të merrte pjesë vetëm nëse Putini do të ishte atje. Të mërkurën, Kremlini tha se do të dërgonte një delegacion në Stamboll, por nuk bëri të ditur se kush do ta përfaqësonte Moskën.