Përpjekja e administratës Trump për të ulur dhe reformuar ndihmat e huaja amerikane po dëmton sistemin e ndërlikuar global që synon të parandalojë dhe të luftojë urinë. Duke luftuar për të menaxhuar krizat e urisë që kishin përfshirë botën edhe para se Presidenti i SHBA Donald Trump të kthehej në Shtëpinë e Bardhë, sistemi ndërkombëtar i monitorimit dhe ndihmës së urisë ka pësuar goditje të shumta nga një ndërprerje e papritur e ndihmës së huaj të SHBA-së. Ngrirja e shpenzimeve, të cilën Trump e urdhëroi me marrjen e detyrës më 20 janar, supozohet të zgjasë 90 ditë ndërsa administrata e tij shqyrton të gjitha programet e ndihmës së huaj. Sekretari i Shtetit Marco Rubio ka thënë se një përjashtim lejon që ndihma urgjente ushqimore të vazhdojë. Por pjesa më e madhe e asaj ndihme emergjente është të paktën përkohësisht e ndalur pasi organizatat humanitare kërkojnë qartësi se cilat programe ndihmash lejohen të vazhdojnë. Problemi ndërlikohet akoma më shumë nga lëvizja e Trump, këtë javë, për të mbyllur ofruesin kryesor të ndihmës të qeverisë së SHBA, Agjencinë e SHBA për Zhvillim Ndërkombëtar USAID. E gjithë kjo po çon një numër të madh njerëzish të dëshpëruar, në uri pasi SHBA është donatori më i madh i vetëm, i ndihmave. Ajo ofroi 64.6 miliardë dollarë ndihmë humanitare gjatë pesë viteve të fundit dhe kjo ishte të paktën 38% e totalit të kontributeve të tilla të regjistruara nga Kombet e Bashkuara.