Një dokument i rrjedhur në media dyshohet se ka zbuluar një propozim dramatik të SHBA-së për të larguar katër vende nga Bashkimi Evropian si pjesë e një strategjie të re të guximshme 'Bëjeni Evropën të Madhe Përsëri'. Dosja sekrete, e raportuar nga Defense One, supozohet se pohon se Uashingtoni synon të tërheqë Austrinë, Italinë, Hungarinë dhe Poloninë nga BE-ja tërësisht, një veprim që do të shkatërronte peizazhin politik të kontinentit. Dokumenti thuhet gjithashtu se bën thirrje që SHBA të mbështesë partitë dhe lëvizjet që 'kërkojnë sovranitet dhe ruajtjen apo rikthimin e mënyrave tradicionale evropiane të jetesës'. Shtëpia e Bardhë ka reaguar, duke mohuar pretendimet, pasi rrjedhja shkaktoi alarm mes mediave evropiane dhe u përhap në platformat sociale. Një zëdhënëse hodhi poshtë pretendimin, duke rrëzuar edhe idenë se ekzistonte një 'version alternativ' i strategjisë. “Presidenti Trump është transparent dhe ka nënshkruar një strategji sigurie kombëtare që e udhëzon qartë qeverinë amerikane të zbatojë parimet dhe prioritetet e saj të përcaktuara”, këmbënguli zëdhënësja Anna Kelly. Strategjia zyrtare e Sigurisë Kombëtare prej 33 faqesh, e publikuar javën e kaluar, kishte ndezur tashmë një debat të zjarrtë për paralajmërimin e saj të ashpër se Evropa përballet me “zhdukje qytetërimi”. Në një intervistë me Politico të martën, Trump përsëri kritikoi ashpër kombet evropiane “që po kalben” dhe udhëheqësit e tyre “politikisht korrektë”, politikat e imigracionit të të cilëve po “shkatërronin” vendet e tyre. Por Defense One i ngriti tensionet në një tjetër nivel, duke publikuar fragmente nga ajo që e përshkroi si një 'version më i plotë' i strategjisë që thuhet se qarkulloi pas dyerve të mbyllura përpara se Shtëpia e Bardhë të publikonte strategjinë. Sipas kësaj faqeje, drafti më i gjerë listoi në mënyrë të qartë Poloninë, Austrinë, Italinë dhe Hungarinë si vende me të cilat SHBA-të duhet të 'punojnë më shumë me qëllim largimin e tyre nga Bashkimi Evropian'. Planet duket se përputhen me politikën e SHBA-së në rajon, ku Trump ka zhvilluar marrëdhënie miqësore me udhëheqës si kryeministri hungarez Viktor Orbán dhe presidenti polak Karol Naërocki. Po ashtu Trump nuk e ka mbajtur sekret dashurinë e tij për Giorgia Melonin, kryeministren konservatore të Italisë.