Donald Trump takohet me Mbretin Abdullah të Jordanisë për atë që ka të ngjarë të jetë një takim i tensionuar pas idesë së presidentit amerikan për rizhvillimin e Gazës dhe kërcënimit për të ndërprerë ndihmën për vendin arab, aleat, të SHBA-së nëse ai refuzon të presë palestinezët. Propozimi i Trump, i paraqitur një javë më parë, që SHBA-të të marrin përsipër Gazën, të zhvendosë banorët e saj të tronditur nga lufta dhe ta transformojnë territorin e shkatërruar në "Rivierën e Lindjes së Mesme" tërhoqi një përgjigje negative nga bota arabe. Mbreti Abdullah ka thënë se kundërshton çdo lëvizje për të aneksuar tokën dhe për të zhvendosur palestinezët. Ai pritet t'i thotë Trumpit një veprim i tillë mund të nxisë radikalizmin, të përhapë kaos në rajon, të rrezikojë paqen me Izraelin dhe të kërcënojë vetë mbijetesën e vendit. Nga ana e tij, Trump ka modifikuar aspekte të propozimit të tij fillestar dhe ka nënvizuar akoma më shumë të tjerat. Ai ka shprehur padurim në rritje me udhëheqësit arabë të cilët e shohin idenë si të pazbatueshme. "Unë mendoj se ai do të marrë" refugjatë palestinezë, u tha Trump gazetarëve në Shtëpinë e Bardhë para vizitës së mbretit Abdullah. I pyetur nëse ai do të ndalonte ndihmën për Jordaninë dhe Egjiptin nëse ata refuzonin ta bënin një gjë të tillë, Trump tha: "Po, pse jo... nëse ata nuk bien dakord, unë do ta ndaloja ndihmën." E vendosur midis Arabisë Saudite, Sirisë, Izraelit dhe Bregut Perëndimor të pushtuar, Jordania tashmë është shtëpia e më shumë se 2 milionë refugjatëve palestinezë në popullsinë e saj prej 11 milionë banorësh, statusi dhe numri i tyre prej kohësh kanë qenë një burim ankthi për udhëheqjen e vendit.