Presidenti i Shteteve të Bashkuara, Donald Trump tha se nuk do ta lejojë Izraelin të aneksojë Bregun Perëndimor, duke kundërshtuar thirrjet e disa politikanëve të ekstremit të djathtë në Izrael që duan të zgjerojnë sovranitetin mbi tokën palestineze dhe të shuajnë shpresat për një shtet palestinez. Kryeministri i Izraelit, Benjamin Netanyahu, është përballur me trysni të madhe nga disa aleatë brenda koalicionit qeverisës për të aneksuar Bregun Perëndimor, gjë që i ka shqetësuar liderët arabë, disa prej të cilëve u takuan të martën me Trumpin në margjinat e Asamblesë së Përgjithshme të Kombeve të Bashkuara në Nju Jork. “Unë nuk do ta lejoj Izraelin të aneksojë Bregun Perëndimor. Jo, nuk do ta lejoj këtë. Nuk do të ndodhë”, u tha Trump gazetarëve në Zyrën Ovale. “Mjaft është mjaft. Ka ardhur koha të ndalet tani”, shtoi ai. Franca, Britania, Kanadaja, Australia dhe Portugalia janë ndër vendet që kanë njohur shtetin palestinez ditët e fundit, pjesërisht për të mbajtur gjallë mundësinë e një zgjidhjeje me dy shtete. Izraeli e ka dënuar vendimin e tyre për njohjen e shtetit palestinez. Ndërkohë, Netanyahu ka mbërritur në Nju Jork për të mbajtur një fjalim në Kombet e Bashkuara. Zyra e Netanyahut tha se kryeministri do t’i përgjigjet deklaratës së Trumpit sapo të kthehet në Izrael.