Presidenti amerikan, Donald Trump, e paralajmëroi drejtpërdrejt udhëheqësin kinez, Xi Jinping, që të mos ofrojë ndihmë për Iranin gjatë bisedimeve në Uashington, tha ambasadori amerikan në Kinë, I cili zbardhi dhe disa detaje të reja të kësaj çështjeje. Diplomati David Perdue, i cili mori pjesë në takimet dypalëshe, tha për CNBC se Trumpi e bëri të qartë se çdo ndihmë kineze për Teheranin – përfshirë informacionet e inteligjencës, komponentët ose pajisjet ushtarake – ishte “plotësisht e papranueshme”. “Ne mendojmë se ka pasur mbështetje të tërthortë, por nuk ka prova të drejtpërdrejta. Jemi shumë të shqetësuar për këtë mbështetje të tërthortë dhe këtë e kemi bërë shumë të qartë”, tha Perdue, I cili në një intervistë tjetër të dhënë për Fox Neës sqaroi se Pekini i ka dhënë garanci Uashingtonit se nuk po ofron një ndihmë të tillë. “Ne kemi parë tashmë zhvillime... Kjo është ajo që përfshin zotimi. Ata na siguruan dje se nuk po e bëjnë këtë”, tha ai. Këto deklarata vijnë pasi ligjvënësit amerikanë dhe ekspertët e sigurisë kombëtare i bënë thirrje Trumpit që të përballej me Xinë lidhur me akuzat se entitete kineze e kanë ndihmuar Iranin përmes informacioneve satelitore, komponentëve të armëve dhe përmes blerjes së naftës iraniane që është nën sanksione.