Presidenti amerikan Donald Trump tha në një intervistë të transmetuar të dielën se nuk po e konsideron seriozisht kandidimin për një mandat të tretë në Shtëpinë e Bardhë, i cili është i ndaluar nga kushtetuta, pasi e ka reflektuar publikisht këtë ide. "Kjo nuk është diçka që po kërkoj ta bëj," i tha ai moderatores së NBC Neës duke shtuar: "Po kërkoj të kem katër vite të shkëlqyera dhe më pas t'ia dorëzoj stafetën dikujt, idealisht një republikani të shkëlqyer, për ta çuar përpara." Ai u shpreh më tej se nuk e dinte nëse duhej ta mbështeste kushtetutën amerikane. "Nuk e di," u përgjigj Trump kur prezantuesja e pyeti drejtpërdrejt nëse ai beson se duhet të mbështesë ligjin suprem të vendit. I pyetur konkretisht nëse qytetarët amerikanë dhe jo-qytetarët meritojnë një proces të rregullt ligjor, siç thotë Kushtetuta e SHBA-së, Trump tha: "Nuk jam avokat. Nuk e di." Lëvizjet agresive të presidentit për të deportuar emigrantët pa dokumente - disa pa mundësinë e një seance gjyqësore - kanë tërhequr kritika të gjera, por Trump këmbëngul se është e nevojshme përballë asaj që ai e ka shpallur si një "emergjencë kombëtare". Sugjerimi për të kërkuar një mandat të tretë në detyrë është komentuar shumë nga studiuesit ligjorë dhe kushtetues. Amendamenti i 22-të i Kushtetutës thotë se "asnjë person nuk do të zgjidhet në detyrën e Presidentit më shumë se dy herë". Por Trump tha në mars se "nuk po bënte shaka" për kërkimin e një mandati të tretë, duke shtuar, pa dhënë hollësi se ka "metoda" që do ta lejonin këtë të ndodhte. Ndryshimi i Kushtetutës për të lejuar një mandat të tretë do të ishte një detyrë e vështirë, duke kërkuar një shumicë prej dy të tretash në të dy dhomat e Kongresit dhe ratifikim nga të paktën 38 nga 50 legjislaturat shtetërore të SHBA-së.