Deri në 10 mijë trupa mund të dërgohen në kufirin SHBA-Meksikë, si pjesë e raprezaljes së donald trump mbi emigrantët, sugjeron një memorandum i brendshëm. Presidenti amerikan, ka urdhëruar tashmë dërgimin e 1500 trupave në kufi për të instaluar barriera, që sipas një burimi nga ushtria nuk do të përfshihen në ruajtjen e rendit. Forcat aktive do t’i bashkohen afër 2.500 pjesëtarëve të Gardës Kombëtare amerikane dhe Forcave Rezervë që aktualisht gjenden në kufirin mes SHBA-së dhe Meksikës. Forcat pritet të përdoren për të mbështetur agjentët e patrullimit kufitar, me logjistikë, transport dhe ndërtimin e barrierave. Ata kanë kryer detyra të ngjashme edhe në të kaluarën, kur Trump dhe ish-presidenti Joe Biden, kishin dërguar trupa aktive në kufi. Sipas ligjit në SHBA, trupave u ndalohet që të kryejnë detyrat e organeve ligjzbatuese në kufi, por kjo mund të ndryshojë. Përmes urdhrave ekzekutivë, Trump ka udhëzuar sekretarët e ardhshëm të Mbrojtjes dhe të Brendshëm që të raportojnë brenda 90 ditësh nëse ata mendojnë se ligji i vitit 1807 duhet të shfuqizohet. Nëse ndodh kështu, atëherë trupat mund të përdoren për detyra civile të organeve të zbatimit të ligjit në tokën amerikane. Trump sapo mori detyrën ka treguar se planifikon të përdorë ushtrinë përgjatë kufirit. Në një ndër urdhrat e parë të firmosur të hënën, Trump udhëzoi sekretarin e Mbrojtjes që të paraqesë një plan për kufirin dhe si të luftohet “imigrimi masiv i paligjshëm”. Gjatë fjalimit në ceremoninë e inaugurimit si president, Trump deklaroi se “do të shpallë gjendje të emergjencës kombëtare në kufirin jugor. Hyrjet e paligjshme do të ndalen menjëherë dhe do të nisë procesi i kthimit të miliona kriminelëve pa dokumente në vendet prej nga kanë ardhur”.