Marco Rubio pritet të mos marrë pjesë në takimin e ministrave të jashtëm të NATO-s që do të mbahet javën e ardhshme, thotë agjencia e lajmeve Reuters, duke cituar dy zyrtarë amerikanë. Rubio, sekretari i shtetit i SHBA-së, planifikon të humbasë takimin më 3 dhjetor - në atë që do të ishte një veprim i pazakontë. Zëvendësi i Rubios, Christopher Landau, do të përfaqësojë SHBA-në në vend të tij, thanë burimet për Reuters. Nga ana tjetër një zyrtar i NATO-s i tha Reuters: se “aleanca organizon takime të shumta ministrash çdo vit, dhe ndërsa shumica e aleatëve përfaqësohen nga ministrat në shumicën e rasteve, nuk është e pazakontë që rrethanat ta pengojnë një ministër të marrë pjesë në të gjithë ose në një pjesë të një takimi të NATO-s.” Mungesa e Rubios vjen ndërsa Shtëpia e Bardhë po përpiqet të ecë përpara me negociatat për t'i dhënë fund luftës në Ukrainë. Donald Trump ka dërguar zyrtarë si në Kiev ashtu edhe në Moskë, për të marrë përgjigje mbi draftin e fundit të planit të paqejes të propozuar. Megjithatë, disa nga aleatët evropianë dhe të NATO-s të Ukrainës shqetësohen se po përjashtohen nga procesi i negociatave. Ndërsa disa ministra mungojnë në të tilla takime, është shumë e pazakontë që sekretari i shtetit i SHBA-së ta humbasë këtë ngjarje. Kjo për shkak të peshës që SHBA ka por dhe nga ana tjetër takime të tilla zhvillohen vetëm dy herë në vit. Në vitin 2017, gjatë mandatit të parë të Trump, sekretari i atëhershëm i shtetit Rex Tillerson fillimisht planifikoi të mos merrte pjesë në një takim të prillit, por më pas ndryshoi axhendën e tij për të mos e humbur. Rubio kohët e fundit ka udhëhequr përpjekjet për të sjellë një fund diplomatik të luftës në Ukrainë dhe ka menaxhuar delegacionin amerikan në Gjenevë fundjavën e kaluar, ndërsa ekipet amerikane dhe ukrainase kanë përshtatur një plan fillestar që do t’i çojë drejt paqes.